Escolares e maiores, os máis vulnerables das estradas
Os escolares e as persoas maiores son os usuarios vulnerables das estradas. Por iso, a consellería de Infraestruturas e Mobilidade ven de asinar un convenio de colaboración coa Asociación Stop Accidentes en Galicia para fomentar a cultura da seguridade viaria entre estos colectivos.
Ademais o convenio define o desenvolvemento de actuacións concretas para Incrementar a seguridade viaria e a promover unha mobilidade máis segura e inclusiva, que os convirta en menos vulnerables.
Deste xeito, Stop Accidentes desenvolverá, ao longo de dous anos, unha serie de medidas específicas para reforzar a seguridade nas estradas. Estas medidas serán apoiadas co financiamento da Xunta de Galicia a través dunha achega de 95.000 euros.
Catro actuacións para fomentar a seguridade viaria
Trátase de catro actuacións que se compromete a levar a cabo Stop Accidentes para contribuír á mellora da seguridade nas estradas e favorecer desprazamentos máis seguros.
A primeira centrarase na mellora da seguridade na contorna do CEIP Santo André de Xeve, en Pontevedra, coa execución dunha senda entre A Piolla, O Couso e O Sobral, na estrada PO-223.
Neste caso, Stop Accidentes impulsará un diagnóstico e o seguimento, tanto da redacción do proxecto como da execución das obras, de cara a favorecer desprazamentos máis seguros no contorno do centro.
Ademais buscarase a implicación e a participación da comunidade escolar no desenvolvemento dese proxecto.
Tamén a Axencia Galega de Infraestruturas colaborará no financiamento da actuación achegando 25.000€ euros e poñendo os medios técnicos para a redacción do proxecto e o desenvolvemento das obras.
Por outro lado, a segunda actuación é o desenvolvemento de proxectos piloto para acadar un contorno seguro en dous equipamentos de xente maior, en centros de día ou residencias de maiores do ámbito rural.
Así, Stop Accidentes elaborará e redactará os proxectos e a Xunta achegará 30.000 € a esa actuación e prestará asesoramento sobre a viabilidade das propostas que se formulen.
O terceiro proxecto é a redacción dun manual de seguridade viaria e boas prácticas dirixido aos usuarios do transporte escolar, tanto aos alumnos, como aos acompañantes ou aos pais. Este manual didáctico será financiado a través da Dirección Xeral de Mobilidade, cunha achega de 20.000 euros.
E por último, o cuarto proxecto céntrase na realización de 100 talleres en colexios e centros de maiores das 4 provincias, para concienciar a estes colectivos sobre pautas de mobilidade segura.
Así que, neste caso, o Goberno galego achegará 20.000 euros e Stop Accidentes difundirá o documento de boas prácticas con accións de carácter socio-educativo que fomenten unha mobilidade segura, inclusiva e saudable.
