Protección Civil da Laracha coopera no operativo polo incendio en Folgoso do Courel

A labor de Protección Civil céntrase no apoio loxístico para o traslado de persoas e material

Voluntarios de Protección Civil da Laracha están a cooperar no operativo para a extinción do incendio do municipio lucense de Folgoso do Courel. Atendendo á solicitude da Xefatura Provincial de Emerxencias, participan dous voluntarios e un vehículo todoterreo prestando apoio loxístico.

Os seus puntos de intervención son, principalmente, Triacastela e Samos. A eses municipios foron evacuados parte dos veciños afectados e aloxados no pavillón do colexio Eduardo Cela Vila e o Albergue Casa Forte de Lusío.

Os voluntarios laracheses tamén se están a encargar de ofrecer protección e seguridade ao convoi dos vehículos particulares. O fan no traxecto duns setenta quilómetros de percorrido de regreso ás vivendas para veciños que foron autorizados. Durante as próximas horas continuarán cumprindo as indicacións do posto de mando avanzado.