A concelleira de Servizos Socias visita aos participantes no programa "A Laracha Acolle"
"A Laracha acolle" vense desenvolvendo desde o pasado mes de decembro
A concelleira de Servizos Sociais, Rocío López, xunto a persoal técnico municipal, mantivo un encontro cos participantes no programa A Laracha Acolle aproveitando a celebración dunha das sesións do Espazo Exprésa-T.
Este programa cofinanciado por Fundación “La Caixa” a través da Obra Social, vense desenvolvendo desde o mes de decembro en Paiosaco. Ten por finalidade a inclusión social e cultural das persoas inmigrantes residentes no Concello da Laracha e, máis concretamente, a do colectivo prioritario das mulleres.
Componse de dúas liñas de acción complementarias. Por unha banda o Taller de alfabetización nas linguas oficiais de Galicia, que se realiza os luns e mércores. O propósito é que as persoas inmigrantes adquiran habilidades lingüísticas que lles permitan desenvolverse de forma autónoma na vida diaria.
Por outra banda, reforzando a acción anterior, o Espazo Exprésa-T. Trátase dun lugar de expresión e participación cultural dirixido ao coñecemento dos costumes, funcionamento e valores da sociedade de acollida. Pero tamén, o intercambio e socialización. As sesións teñen lugar os venres.
Programa innovador
"A Laracha Acolle" trátase dun programa innovador, que se leva a cabo seguindo unha metodoloxía alternativa de ensinanza-aprendizaxe. E, además, con perspectiva de xénero, traballando contidos e empregando unha linguaxe non sexista, así como poñendo en valor o papel das mulleres na sociedade.
A persoa responsable do programa destacou o esforzo que as mulleres están a facer para asistir ás clases. Tamén, o seu interese por aprender unha nova lingua, así como por coñecer unha cultura diferente. Iso permite acceder aos servizos e prestacións que melloren as súas condicións de vida. É, sobre todo, a educación dos seus fillos e fillas, pois é un tema que lles ocupa e preocupa especialmente.
