Curso sobre coidados a persoas con dano cerebral
Alumnas do Obradoiro de Emprego da Laracha reciben formación sobre atención no fogar a persoas con dano cerebral
As alumnas da especialidade de Atención sociosanitaria a persoas dependentes realizan un curso de atención no fogar de persoas con dano cerebral. Impartido pola Federación Galega de Dano Cerebral (FEGADACE) a duración alcanzó as 8 horas. Á fronte do curso estiveron unha técnica de formación, a traballadora social de FEGADACE e a terapeuta ocupacional da Asociación de Dano Cerebral da Coruña (ADACECO). Traballaron aspectos como:
- detección do dano cerebral
- pautas para avaliar a evolución da persoa afectada
- habilidades comunicativas
- transferencias e cambios posturais, hixiene e curas
- acompañamento no tempo libre e actividades de lecer, entre outros
Esta formación complementa a que xa recibiron dentro do Obradoiro de emprego A Laracha VII para a obtención do certificado de profesionalidade. Esta semana o grupo de alumnas traballadoras inician a terceira e última quenda de prácticas en centros de día e residenciais da:
- Laracha
- Arteixo
- Real Institución Benéfico Social Padre Rubinos
De maneira paralela, dentro do Obradoiro de emprego A Laracha VII, a especialidade de Pintura industrial en construción continúa cos traballos de mellora de edificios públicos da Laracha, como fixeron no pavillón municipal e no campo de fútbol A Porta Santa de Paiosaco.
Este programa dual de formación e emprego é organizado e financiado grazas á cooperación entre o Concello da Laracha e a Consellería de Emprego e Igualdade da Xunta de Galicia.