Segunda edición do concurso de fotografía en conmemoración do Día das Mulleres Rurais
Na segunda edición repartiranse premios por valor de mil euros ás imaxes que obteñan máis “me gusta” na páxina de Facebook da Laracha
O Concello convoca a segunda edición do concurso de fotografía “Día da Muller Rural” no que se repartirán premios por valor de mil euros. Deste xeito, A Laracha únese o venres 15 de outubro á conmemoración do “Día Internacional das Mulleres Rurais”. Deixamos aquí as imaxes gañadoras de 2021.
O obxecto do certame é reflectir nas imaxes as particularidades do presente e pasado da Laracha, poñer en valor o papel e o traballo desempeñado no rural e a súa contribución ao desenvolvemento local.
Poderá participar no concurso de forma individual calquera persoa que sexa residente no termo municipal da Laracha. Consta de dúas categorías:
- “Mulleres rurais do presente”: As fotografías recollerán imaxes da vida cotiá das mulleres do rural da Laracha na actualidade. O obxectivo é que as fotografías poñan en valor o papel e o traballo desempeñado polas mesmas e a súa contribución ao desenvolvemento local da Laracha.
- “Mulleres rurais do pasado”: As fotografías recollerán imaxes da vida cotiá das mulleres do rural da Laracha no pasado. O obxectivo é recuperar fotografías antigas que amosen aspectos da vida e o traballo das mulleres rurais da Laracha no pasado.
Do 22 de setembro ao 6 de outubro
As persoas que desexen participar na segunda edición teñen que enviar a fotografía e unha breve descrición da mesma a través do formulario que estará dispoñible:
- na web municipal
- de xeito presencial no Edificio Administrativo da Laracha
O prazo para entregar das imaxes será do 22 de setembro ao 6 de outubro. Repartiranse un total de mil euros en seis premios ás tres fotografías de cada categoría que obteñan máis “me gusta” no Facebook do Concello da Laracha dende o día 7 e o 13 de outubro ás 10:00 horas. A contía dos premios de cada categoría sé:
- 1º premio: 300 euros
- 2º premio: 150 euros
- 3º premio: 50 euros