Novidosa iniciativa na nova edición do programa "Outono de contos"

"Outono de contos" incluirá por primera vez na Laracha lecturas educativas con cans e sesións teatralizadas

‘Outono de Contos’, que o Concello da Laracha pon en marcha cada ano, incluirá cinco sesións de contacontos teatralizados unha novidosa iniciativa consistente na lectura educativa con cans.

Este programa, que se vai levar a cabo nas tres bibliotecas municipais, pretende o triplo obxectivo:

• ofrecer aos nenos unha alternativa divertida para o seu tempo de ocio
• favorecer a conciliación da vida persoal e laboral dos seus pais
• fomentar a lectura entre os máis pequenos da casa

A actividade principiará o venres 30 de setembro con Xogar e aprender galego mola! A miña familia é a mellor a cargo de Gema Pardo. Será desde as 18:00 horas na biblioteca da Laracha e dirixido a nenos de entre 4 e 7 anos de idade.

O domingo 2 de outubro na Casa da Cultura da Laracha a partir das 12:00 horas ofrécese o contacontos para bebés Arrolos, de Mamá Cabra.

O venres 7 de outubro ás 18:00 horas na biblioteca de Caión Sabela Gago realizará o contacontos O señor do Castelo, dirixido a maiores de catro anos.

Para ese mesmo público tamén está pensando o espectáculo A pequena gran inventora, de Trémola Teatro, que terá lugar o venres 14 de outubro desde as 18:00 horas na biblioteca de Paiosaco.

O último dos contacontos será Toupiciencia, de A Xanela do Maxín, o venres 21 de outubro tamén a partir das 18:00 horas na biblioteca da Laracha.

Lectura educativa con cans

Ademáis, o Concello pon en marcha unha novidosa iniciativa co obxectivo de mellorar as habilidades de lectura dos nenos mediante a intervención de cans. Eles están especialmente adestrados para establecer unha conexión emocional e relacionarse co lector segundo as súas necesidades.

Vai dirixida a rapaces de idades comprendidas entre os 5 e os 11 anos. Levarase a cabo na biblioteca de Caión (hoxe, 28 de outubro), Paiosaco (4 de novembro) e A Laracha (11 de novembro), sempre en horario de 17:30 a 19:30 horas. Dado que as prazas son limitadas, nas lecturas educativas con cans requírese de inscrición previa, que é gratuíta, na biblioteca correspondente.