Campaña de desbroce nas catro parroquias máis poboadas da Laracha

As actuacións de desbroce adiantáronse con respecto a anos precedentes como medida de seguridade ante a situación provocada pola Covid-19

O Concello da Laracha iniciou a campaña de desbroce das cunetas das vías públicas de titularidade municipal. Estes traballos lévanse a cabo no final da primavera, durante o verán e ata o inicio do outono. O obxectivo é eliminar a vexetación herbácea nas marxes das estradas para mellorar a visibilidade, manter o ornato público e previr riscos de incendio.

Así, as primeiras parroquias nas que se están a acometer os traballos son as catro máis poboadas do municipio. Así Torás, incluíndo o núcleo urbano da Laracha, é a parroquia obxecto da primeira intervención. As seguintes serán Lestón (incluíndo Paiosaco), Cabovilaño e Caión. Posteriormente actuarase nas outras nove parroquias rurais.

Adianto dos traballos

Nesta ocasión, o comezo do desbroce adiantouse nuns quince días con respecto ao ano anterior. E unha medida de seguridade ante a situación actual provocada pola Covid-19. Ademais de mellorarse o tránsito dos vehículos, facilitarase que os peóns que camiñan polas vías eviten invadir a zona de circulación rodada pola presenza de vexetación nos arcéns.

Así mesmo, como anos precedentes, actuarase en todas as estradas, vías, pistas asfaltadas e camiños forestais de titularidade municipal. Isto supera os 600 quilómetros de lonxitude lineal. As mesmas labores inclúen as parcelas e terreos propiedade do Concello que non están no contrato do servizo de limpeza e mantemento de zonas verdes. En total, son uns 150.000 metros cadrados de superficie.

Prácticas sostibles

Tradicionalmente, á roza forestal seguíalle o procedemento de queima para a destrución dos residuos xerados. Esta constitúe unha práctica nada recomendable, debido a que presenta inconvenientes como a vertedura de CO2 á atmosfera ou o incremento do risco de incendios forestais. A práctica máis indicada na actualidade consiste en verter a materia orgánica triturada resultante de novo ao terreo. Deste xeito favorécese a achega de nutrientes ao chan, que contribúe ao crecemento do estrato arborizado.