Máis de cen laracheses participan na excursión ao Barco de Valdeorras
O Concello organiza unha excursión ao Barco de Valdeorras para persoas maiores de 55 anos de idade, xubiladas ou pensionistas.
Máis dun centenar de laracheses participaron o 29 de abril na excursión ao Barco de Valdeorras que organizou o Concello para persoas maiores de 55 anos de idade, xubiladas ou pensionistas. Formaron parte da expedición o alcalde, José Manuel López Varela, e a edil de Servizos Sociais, Rocío López.
A xornada incluíu visitas guiadas por lugares como os xardíns de Viloira, o malecón xunto ao río Sil e o Santuario das Ermidas, así como á bodega “Roandi” de denominación de orixe Valdeorras, onde coñeceron como é a elaboración dos mencías e godellos e desfrutaron dunha cata de viño.
O Concello levou a cabo esta iniciativa para continuar ofrecendo propostas a eses colectivos que contribúan a facilitar o aproveitamento do tempo de lecer, a potenciar o envellecemento activo e a tecer relacións sociais entre a veciñanza para evitar a exclusión.
